“خايف أنهي العلاقة الملزقه دي”… شقيق ياسمين عبد العزيز يثير الجدل بصورة وتعليق

1 يوليو 2020 - 1:01ص أحمد عربى، مشاهير، ممثلون القاهرة - كل النجوم

عاد الفنان وائل عبد العزيز إلى إثارة الجدل من جديد بعد أن نشر تعليقا عبر صفحته على “فيسبوك” أكد الكثيرون أنه يلمح به إلى ما أثير فى الفترة الأخيرة حول شقيقته ياسمين عبد العزيز وزوجها أحمد العوضي بعد ظهورهما معاً في عدد من الصور، وأخبار حملها منه ثم نفيها الخبر.

وقال وائل معلقاً على صورة بها فنجان من القهوة رسم على وجهه صورة ظلالية لرجل وزوجته: “خايف آخد بوء أنهي العلاقه الملزقة دي”.

وتفاعل معه عدد من الجمهور الذي تساءل البعض عمن يقصده بقوله هذا في حين وافقه في رأيه البعض الآخر حيث جاءه أحد التعليقات يقول: “لا متخافش اشرب بالهنا والشفا وانهى المهزلة اللي تجذع النفس دي”.

وكان وائل عبد العزيزقد هاجم شقيقته النجمة ياسمين عبد العزيز بسبب علاقتها مع الفنان أحمد العوضي، والتي كشف عنها وائل منذ فترة وتسببت في أزمة كبرى انتهت بإعلان العوضي وياسمين حبهما لبعضهما ثم الزواج.

وكتب وائل على حسابه الخاص على موقع “الفيس بوك”، قال فيها: “بصي يا ياسمين يا عبد العزيز يا أختى، أنا معاكى وفى ضهرك من وأنتي صغيرة شيلت مشاكل كتيًر بسببك من وأنتى عيلة صغيرة، بداية من مشاكلك مع الشاعر وبرادة وأنتي عارفة إن أنا أتاذيت فيها إزاي وقضية الشغالات مؤخرًا غير قضية الضرب اللي كانت بينك وبين بنت هشام سليم الممثلة اللي لبستيها التورتة في وشها”.

وأضاف: “وقفت جمبك بكل ما أملك من قوة أدافع عنك فى كل موقف صعب مر عليكى ونسيت حياتي ونفسي عشانك وبقى كل همي أنا ووالدتك، إنك تكبري وتبقي نجمة في مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللي ساندتك ووقفت جنبك في طلاقك، لكن هنهرتل وتروحي تعرفي واحد أصغر منك بـ10 سنين لا من سنك وتتصوري صور مالهاش أي لازمة على حساب سمعتك وسمعتنا، لا ومحدش هيسمح، من أمتى وإحنا بنعمل أعياد ميلاد وتنزل على السوشيال ميديا، من أمتى الناس بتجيب فى سيرتنا؟ ونقعد نتعاكس على السوشيال ميديا؟”.

وتابع: “ومع ذلك حياتك وأنتي حرة فيها، أنا هتكلم على الشق اللي يخصني، أنتي مقاطعة كل العيلة عشان تعملي اللي على مزاجك، إحنا دلوقتي وعايزين نفهم العلاقة دي إيه ورايحة على فين” .

وهاجم أحمد العوضي، قائلا: “أما بالنسبة للأخ اللي ماشي وراكي في كل حتة وشايفك البيضة الدهب اللي هتفقسله كل يوم.. أحب أقولك يا راجل لما تيجي تدخل بيت تدخله من بابه يا راجل!! وتقعد مع رجالة البيت!!.. دى الأصول وده الاحترام”.

وأكمل: “وطبعًا لأنك عارف أنك مرفوض رافضًا باتًا فاعمرك ما هتعمل ده ومعندكش غير طريق الشمال اللي أنت سالكه من سنين مع بنات الناس!!.. أنا من رأيى كفاية عليك البطولة اللي أخدتها والعربية المرسيدس الهدية، وتركز في شغلك وتسيبنا في حالنا لأن طول عمرنا فى حالنا ومحدش سامع عننا حاجة وملوش لازمة جو الصور والمعاكسات ده وأنا مبخفش من تهديد حد”.

ليرد عليه أحمد العوضي عبر صفحته بفيس بوك قائلا: “أنهي بيت اللي أدخله من بابه.. إن كانت هي اللي بتصرف عليك وعلى ابنك اللي مخبيه وراميه وهي بتدفعله مصاريف مدرسته.. باب إيه يا بني أدخله هو أنا شفت راجل واقف جنبها.. دي واحده انت مبتعملش حاجة غير إنك بتستنزفها هي ومامتها.

وتابع البوست: “باب إيه يابني اللي هدخله من بابه وأكلم واحد بيتكلم على عرضه ولحمه قدام الناس.. يابني أنا من عين شمس منطقة شعبية اتربيت على أن الأخت والأم والست الكلام عليهم من الكبائر.. عربية إيه يابني أنا أجري الحمد لله يعيشني كويس ويجيبلي عربية حلوة وبیت كويس.. بمجهودي وشغلي مش على عرق واحدة ست.. باب إيه يا حبيبي اللي أدخله وانت أصلا عايش باسمها.. أنا شقيت على حالي بعرقي.. لكن أنت فشلت في كل شيء فشلت كممثل وفشلت كأب وفشلت كأخ وفشلت كبني آدم”.

لتخرج بعدها الفنانة ياسمين عبدالعزيز عن صمتها وتنشر صورة تجمعها بأحمد العوضي وتعلق عليها قائلة: “بحبك يا أحمد.. ليرد العوضي بنشر نفس الصورة قائلا: بحبك يا ياسمين”.

الكلمات الدلالية لـ “خايف أنهي العلاقة الملزقه دي”… شقيق ياسمين عبد العزيز يثير الجدل بصورة وتعليق

التعليقات لا يوجد تعليقات لـ ““خايف أنهي العلاقة الملزقه دي”… شقيق ياسمين عبد العزيز يثير الجدل بصورة وتعليق“

لا يوجد تعليقات بعد..

اترك تعليقك




تصميم و تطوير ورعاية
2018 © سوا فور