عمرو سمير عاطف لأحمد مكي: لا أتمنى مقابلتك مرة أخرى حتى لو “صدفة”

16 ديسمبر 2018 - 7:49م أحمد عربى، مشاهير القاهرة - كل النجوم 390 مشاهدة

تسبب تصريح أحمد مكي في لقائه الأخير خلال برنامج “معكم منى الشاذلي” في غضب المؤلف عمرو سمير عاطف، بعدما صرح مكي أن السيت كوم “تامر وشوقية” كان إخراجه وهو من قام بتطويره ليكون بهذا الشكل.

وهنا رد عليه المؤلف عمرو سمير عاطف عبر صفحته الشخصية على facebook قائلا: “الواحد ما بقاش فيه حيل يدخل في جدال والموضوع ما بقاش فارق قوي وخصوصًا أن “تامر وشوقية” كانت مرحلة عدى عليها سنين طويلة وانتهت”.

واستكمل “الكلام اللي مكى قاله في اللقاء عن “تامر وشوقية” العمل اللي كان بدايته الحقيقية والسبب اللي خلاه يبقي ممثل مش مخرج، كلام غير دقيق لأنه بيدي إيحاء أنه كان له دور في تطوير الموضوع وكان سبب أن يبقي فيه حاجة اسمها ست كوم وأنه بيحب “يذاكر” الموضوع وبيقول “جبنا كتب” و”عملنا “وده كله كلام فيه مبالغة في تصوير دوره”.

وأكد عمرو أن “الحقيقة هى أن مكي كان سيخرج المسلسل فعلًا ولم يكن يقرأ الحلقات ولا كان بيجهز نفسه لإخراج العمل كما يجب أو على الأقل مثلما أنا كنت متوقع ومنتظر منه ولغاية ما قربنا نخلص كتابة كان مشغول في أعمال ثانية وما كناش بنشوفه خالص لدرجة إني أنا اللي اشرفت على تصميم وتنفيذ ديكور الجزء الاول من المسلسل.

ولما ابتدى التصوير مكي أخرج أول حلقتين وأنا وشريف عرفة بصفته المنتج والكتاب اتفرجنا عليهم وكان المستوي مش كويس ولو كان مكي استمر في إخراج الحلقات ما اعتقدش إنها كانت ها تنجح، وقام شريف عرفة بوقف التصوير بعد الحلقتين لمدة أسبوع وقرر أنه سيخرج هو الحلقات ومكي ها يعمل دور هيثم وقد كان”.

وتابع: “هل هذا معناه أن مكي لم يضف للعمل؟ لا طبعًا ميى كان إضافة مهمة وكبيرة جدا لتامر وشوقية وفعلا دور هيثم ماكنش مكتوب كدة في الأول، لكن بعد ما مكي ابتدى يعمله بالطريقة دى ابتدينا نكتب الدور بطريقة مختلفة”.

ثم استرد قائلا: “لكن تامر وشوقية ما اتعملش لأن مكي كان عايز يعمل حاجة مختلفة، تامر وشوقية أنا فضلت سبع سنين ألف بيه على المنتجين والمخرجين لغاية ما شريف عرفه تحمس لانتاج العمل وشخصية هيثم مش من إبداع مكي لوحده أنا والكتاب اللي اشتغلوا في العمل وشريف عرفة ساهمنا في خروجها بالشكل ده ولما مكي راح يعمل فيلم اتش دبور طارق نور طلب مني إنى أرفع قضية عليه بصفتي مؤلف الشخصية وشريف عرفه كلم هشام سليمان اللي كان بينفذ إنتاج الفيلم وقاله لازم تدفعوا للمؤلف وكان ممكن جدًا بمنتهى البساطة إننا نوقف تصوير الفيلم لكن أنا رفضت إني اتخذ أي اجراء ورفضت إني اخد أي مقابل من هشام سليمان، وقلت لشريف عرفة أنا ومكي كنا اصحاب وهو اختار إنه ينهي الصداقة دي ويبقي نجم وفي الحقيقه ده تمن مش قليل يعنى الراجل ما باعش بالرخيص”.

وأضاف: “ربنا يبارك له والحمد لله بقي زي ما انتوا شايفين كده، في النهاية أنا بأحب تامر وشوقية جدًا وخصوصًا إني تعبت فيه قوي ومكي فنان كبير وموهوب مش بس كممثل لكن برضه كمخرج ومازلت شايف إنه لو رجع يخرج مرة تانية أكيد ها يبقي مخرج من أهم المخرجين في مصر ويمكن في تاريخ السينما المصرية، لكن للأسف الواحد بيضطر يتكلم عن نفسه وعن مجهوده لما يلاقي تصرفات وكلام بيعكس نرجسية ورغبة في التكويش على كل حاجة زي دة”.

وأكد عمرو: “بتمنى التوفيق لمكي دايمًا لكن لا أعتقد ولا أتمنى أن نتقابل ثانية لا في عمل ولا حتى صدفة”.

الكلمات الدلالية لـ عمرو سمير عاطف لأحمد مكي: لا أتمنى مقابلتك مرة أخرى حتى لو “صدفة”

التعليقات لا يوجد تعليقات لـ “عمرو سمير عاطف لأحمد مكي: لا أتمنى مقابلتك مرة أخرى حتى لو “صدفة”“

لا يوجد تعليقات بعد..

اترك تعليقك




تصميم و تطوير ورعاية
2018 © سوا فور