فى محاولة لتشجيع الشباب تامر حسنى يكشف عن مهنته قبل الشهرة “أنا اشتغلت من عامل بنزينة لفاعل مبانى”..شاهد

16 أغسطس 2022 - 5:23م منار حسين مجتمع النجوم

وجه الفنان المصري تامر حسني، عددا من الرسائل لجمهوره حثهم فيها على العمل والسعي وراء أحلامهم وكشف من خلال منشوره عدد المهن التي عمل بها قبل الشهرة.

وقال تامر حسني، في منشور عبر صفحته الشخصية بموقع “إنستجرام”: “قرأت معظم التعليقات على قد ما قدرت على آخر بوست ليا اللي فوق دا، وفهمت أكتر حاجتين من تعليقاتهم عاملين احباط لمعظمكم 1- اليأس من النجاح 2- إحباط المقربين، وبعضكم واصل لفقدان الأمل والشغف وبعضكم فاقد الأمل في الحياة نفسها”

وأضاف تامر: “هطلب طلب منكم قبل اي شيء افتكروا معاناتي في بدايتي وظروفي الصـــعبة من غير أب ومن غير أي فلوس وبنزل أشتغل في الشوارع من عامل بنزينة لسوبر ماركت لفاعل يعني اللي بيبنوا العمارات بطلع طوب وأسمنت عشان أرجع بيتي لأمي الغلـــبانة بأي خمسة جنيه، بالإضافة لمرتب النادي لما كنت بلعب كوره كان مرتبي 22 جنيه في الشهر منهم بقى تحويشة المية والكهربا وعمليات أخويا عشان كان عيان لفترة كبيرة كنت بعمل المستحيل فعلًا عشان أمي وأخويا وعشان اوصل لهدفي”.

كان نفسي أكون لاعب كورة

وتابع: “كان جوايا سعي دائم لطريقين الكورة والغناء وبقول دا عشان ناس كتير عايز أنصحها بالخطة البديلة عشان لو الحلم مجاش يكون في غيره زي ما انا كان نفسي أبقى لاعب كورة والكورة مش ليا والأندية كلها مشوني رغم تفوقي كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر ولما آمنت بكده فهمت قدام إن ربنا كان شايلي الأحسن ليا بس ساعتها مكنتش فاهم”.

وتابع: اإللي بيسأل نفسه دلوقتي يعني أنا أكمل في حلمي ولا أشوف حلم تاني هقوله دايمًا أطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكدلك تكمل أو لا بس اجتهد واتعب عشان المجهود دا ليه كرم متحوشلك في مجالك التاني فاوعى تقول تعبت عالفاضي”.

وأردف: “بالنسبة للمحبـــطين هيفضلوا موجودين انت اللي بتسمعلهم وانت اللي بتسمح إنك تتأثر بيهم امنع دا فورًا متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو عشان كدا بقولك إنت السبب دايمًا قول يا رب واجتهد وافهم إن الراحة المطلقة في الجنة بس واحنا على الأرض وربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه عشان كتير قبلينا كانت ظروفهم أصـــعب ووصلوا يبقى الموضوع فينا، متبقاش أكبر عدو لنفسك، إنت السبب، خد قرار صـــارم فورًا في التغير والنهوض والنجاح، والله هتوصل متسمعش غير لقلبك وسلم قلبك للّي خلقه وتوكل على الله”.

تامر حسني

الكلمات الدلالية لـ فى محاولة لتشجيع الشباب تامر حسنى يكشف عن مهنته قبل الشهرة “أنا اشتغلت من عامل بنزينة لفاعل مبانى”..شاهد

التعليقات لا يوجد تعليقات لـ “فى محاولة لتشجيع الشباب تامر حسنى يكشف عن مهنته قبل الشهرة “أنا اشتغلت من عامل بنزينة لفاعل مبانى”..شاهد“

لا يوجد تعليقات بعد..

اترك تعليقك




تصميم و تطوير ورعاية
2018 © سوا فور