خرجت مي أبو ربيع، طليقة الممثل وائل عبد العزيز شقيق النجمة ياسمين عبد العزيز، وكشفت العديد من الأمور الخاصة بعلاقتها مع طليقها خاصة بعد الجدل الذي أثاره بهجومه على شقيقته بسبب علاقتها بالفنان أحمد العوضي وصورها معه من عيد ميلادها الأخير، والأمر الذي انتهى بإعلان الثنائي ياسمين والعوضي عن حبهما لبعضهما.
وكتب مي على حسابها بموقع “فيس بوك”: “أنا طليقة وائل عبد العزيز أخو ياسمين عبد العزيز.. أولا وائل مش بيصرف على ابنه من يوم ما أتولد وأنا انفصلت منه وابني عنده 5 شهور ولحد دلوقتي ولا بيصرف عليه ولا حد من أهله بيصرف علي ابني غيري.. ابني عنده دلوقتي 11 سنة، مؤخرًا بس من 3 سنين ياسمين قالتلي أنا متكفلة بمصاريف الدراسة دفعت سنتين ومش المصاريف كاملة كمان، وبعد كده قالتلي أنا ظروفي ماتسمحش ادفع مصاريف تاني.. قلتلها انتي اللي عرضتي تدفعي قالتلي (ورجعت في كلامي في مشكلة!) ده الموضوع باختصار.. وياريت محدش يجيب سيره ابني لو سمحتوا.. وحقي وحق ابني حاخده بالقانون”.
وبدأت الحكاية ببوست كتبه وائل عبد العزيز على فيس بوك يهاجم فيه تصرفات شقيقته ياسمين عبد العزيز مع الفنان أحمد العوضي وقال: “بصي يا ياسمين يا عبد العزيز يا أختي، أنا معاكي وفي ضهرك من وأنتي صغيرة شيلت مشاكل كتيًر بسببك من وأنتى عيلة صغيرة، بداية من مشاكلك مع الشاعر وبرادة وأنتي عارفة إن أنا أتاذيت فيها إزاي وقضيته الشغالات مؤخرًا غير قضية الضرب اللي كانت بينك وبين بنت هشام سليم الممثلة اللي لبستيها التورتة في وشها”.
وأضاف شقيق ياسمين: “وقفت جمبك بكل ما أملك من قوة أدافع عنك في كل موقف صعب مر عليكى ونسيت حياتي ونفسي عشانك وبقى كل همي أنا ووالدتك، إنك تكبري وتبقى نجمة في مجالك، سيبنالك اختياراتك كلها لنفسك ووفقنالك على معظم قراراتك وكنت الوحيد اللي ساندتك ووقفت جنبك في طلاقك، لكن هنهرتل وتروحي تعرفي واحد أصغر منك بـ10 سنين لا من سنك وتتصوري صور مالهاش أي لازمة على حساب سمعتك وسمعتنا، لا ومحدش هيسمح، من أمتى وإحنا بنعمل أعياد ميلاد وتنزل على السوشيال ميديا، من أمتى الناس بتجيب في سيرتنا؟ ونقعد نتعاكس على السوشيال ميديا؟.
وتابع وائل: “ومع ذلك حياتك وأنتي حرة فيها، أنا هتكلم على الشق اللي يخصني، أنتي مقاطعة كل العيلة عشان تعملي اللي على مزاجك، إحنا دلواقتي وعايزين نفهم العلاقة دي إيه ورايحة على فين” .
وتابع: “أما بالنسبة للأخ اللي ماشى وراكي في كل حتة وشايفك البيضة الدهب اللي هتفقسله كل يوم.. أحب أقولك يا راجل لما تيجي تدخل بيت تدخله من بابه يا راجل!! وتقعد مع رجالة البيت!!.. دي الأصول وده الاحترام.. وطبعًا لأنك عارف أنك مرفوض رافضًا باتًا فاعمرك ما هتعمل ده ومعندكش غير طريق الشمال اللي أنت سالكه من سنين مع بنات الناس!!.. أنا من رأيي كفاية عليك البطولة اللي أخدتها والعربية المرسيدس الهدية، وتركز في شغلك وتسيبنا في حالنا لأن طول عمرنا في حالنا ومحدش سامع عننا حاجة وملوش لازمة جو الصور والمعاكسات ده وأنا مبخفش من تهديد حد”.
لم تمر ساعات قليلة على ما كتبه وائل عبد العزيز حتى رد عليه أحمد العوضي برسالة عبر حسابه بموقع فيس بوك وإنستجرام قال له فيها :” “انهى بيت اللي ادخله من بابه.. ان كانت هي اللى بتصرف عليه وعلى ابنك اللي مخبيه وراميه وهي بتدفعله مصاريف مدرسته.. باب ايه يا ابنى ادخله هو انا شفت راجل واقف جنبها.. دي واحدة انت مبتعملش حاجة غير أنك بتستنزفها هي ومامتها.. باب ايه يا ابني الى هدخله من بابه واكلم واحد بيتكلم على عرضه ولحمه قدام الناس.. يا ابني انا من عين شمس منطقية شعبية اتربيت على ان الأخت والام والست الكلام عليهم من الكبائر.. عربية ايه يا ابني انا اجرى الحمد لله يعيشني كويس ويجيبلي عربية حلوة وبيت كويس.. بمجهودي وشغلي مش على عرق واحدة ست.. باب ايه يا حبيبي اللي ادخله وانت أصلا عايش باسمها.. انا شقيت على حالي بعرقي.. لكن انت فشلت في كل شيء فشلت كممثل وفشلت كأب وفشلت كأخ وفشلت كبنى ادم”.
