برغم خلافاتهم السابقة، حرص الفنان المصري أحمد فهمي على الاعتذار للاعب نادي الزمالك محمود عبد الرازق شيكابالا، بعدما نشر بعض جمهور النادي الأهلي فيديو لـ”كلب” وصفوه بلاعب الزمالك، وذلك عقب مباراة القمة.
فهمى كتب، على حسابه الخاص على موقع “الفيس بوك”: “رغم خلافى معاه الشديد، ومفيش صلح من بعيد ولا قريب بيني وبينه، لكن موضوع الكلب والفيديو ده حاجة عنصرية جداً الصراحة ومنظر بشع”.
وأضاف: “احنا جمهور كبير ومحترم بنقول على الغلط غلط حتى لو طالع من عندنا، الاعتذار عن اللقطة دي واجب، بعتذرلك، لكن موقفى منك لن يتغير”.
أحمد فهمي عاد وتراجع عن اعتذاره، وذلك عدما نشر شيكابالا صورة له وهو يرفع الحذاء في وجه جماهير الأهلي خلال مباراة سابقة.
فهمي عبر عن غضبه الشديد من هذه الصورة، حيث كتب: “أنا بسحب أي كلمة قلتها عنك فعلا.. الستوري بتاعته حالا.. حاجة تقرف..واللي مش عاجبه يشيلني من عنده”.
الفنان المصري أضاف: “الأهلي وجمهوره أسيادك.. وبعدين عيب تبقى ابن النادي الأهلي وماضي له قبل كدة وتعمل كدة.. فك كدة ماتبقاش نفسيتك أفشة يا نباطشي”.
وكانت قد وقعت مشادة كلامية بين الفنان أحمد فهمي وبين محمود عبدالرازق الشهير بـ”شيكابالا” قائد ولاعب وسط نادي الزمالك، وذلك أثناء تواجدهما في حفل زفاف شريف منير حسن عضو مجلس إدارة نادي الزمالك السابق.
شيكابالا عاتب فهمي على تصريحات سابقة له ضده، عقب فوز الزمالك ببطولة السوبر المصري الأخيرة بركلات الجزاء الترجيحية، وهو ما أدخلهما في مشادة.
أحمد درويش، مدير أعمال فهمي، كشف تفاصيل القصة من البداية، حيث نشر فيديو، على حسابه بموقع “فيسبوك”، قال فيه: “هنتكلم فى الموضوع اللى واخد تريند على السوشيال بسبب اللى حصل بين الفنان أحمد فهمى ولاعب نادى الزمالك، الموضوع ليه خلفية قبل كده هنحكيها عشان الموضوع يبقى واضح لكل الناس، لأن فى أخبار غير صحيحة”.
وأضاف: “البداية كانت بعد ماتش السوبر فى الإمارات والإشارات البذيئة من لاعب نادى الزمالك، أحمد فهمى نزل بوست وقتها على السوشيال ميديا، وقال “أنت يا شيكابالا بتركب بونط على حساب نادي الزمالك وعامل نفسك زملكاوي وأنت كنت بتكلمني وقت فشل احترافك في البرتغال وكنت عايز ترجع على النادى الأهلى وتواصلت معايا وكلمتنى أكتر من مرة عشان أتواصل مع مسئولين النادى الأهلى”.
وتابع: “بالفعل أحمد فهمى تواصل مع مسئولي النادي الأهلى والمسئولين في النادى قابلوا الموضوع بالرفض وفهمى قال الموضوع ده، وشيكابالا اعتبر إن دي إهانة وإنه اتفضح أمام جمهور الزمالك”.
وأكمل: “بعدها أحمد فهمى كان أول واحد دافع عن شيكابالا ونزل بوست رفض التنمر والغلط فى الشكل والبشرة وجميع أشكال التنمر لا يجوز، وقال إنه خارج الرياضة وإن ليه علاقة بالإنسانية وقال أنا بدعم شيكابالا بكل وضوح”.
وعن المشادة التي حدثت بينهما، قال: “إمبارح كنا فى فرح أحد الأصدقاء وهو عضو مجلس إدارة سابق فى نادى الزمالك وجه مصطفى العماري وهو أحد الأصدقاء المشتركين بين فهمى وشيكابالا، وقاله تعالى يا فهمى وسلم.. فهمى راح بكل ود وقاله: “إزيك يا شيكا” ودا حصل قدام عينيا، شيكابالا قاله: “أنت بتقول على السوشيال ميديا إن أنا بركب بونط”، فهمى قاله: “دا مش وقته ولا مجاله إننا نتكلم ودا فرح واحد صاحبنا”، فقاله “لاء.. أنت بتغلط فيا على السوشيال ميديا”.
واستطرد: “فهمى قال لـ”شيكابالا”: “أنت غلطت فى ناس تخصنى”، فشيكابالا شــــتم أحمد فهمى وجمهور الأهلى، وفى هذه اللحظة رد فهمى كمشجع وغلط فيه مباشرة بشخصه ولم يسئ لنادى الزمالك أو جمهور الزمالك، والخناقة بقت بين شخص بيغلط فى الأهلى وهو بيرد عليه لشخصه هو”.
وأضاف: “تدخلنا وفصلنا بينهم واحنا بنرد بالفيديو ده على كل الناس اللى بتنزل الأخبار المغلوطة وأحمد فهمى كان محترم من أول الموقف لأخره، ولما رد كان رده كمشجع أهلاوى مش كفنان، ورد عشان الراجل ده غلط فى جمهور الأهلى”. واختتم كلامه، بقوله: “والكلام ده شاهد عليه أعضاء مجلس إدارة نادى الزمالك، وجمهور نادى الزمالك، وابن رئيس نادى الزمالك كان بيحوش فهمى”.
