أحمد حلمي: حبيت خالة صاحبي وأنا عندي 6 سنين.. وملحقتش أشبع من أبويا وهذا سر نجاح زواجي مع مني زكي 20 عام
تحدث الفنان أحمد حلمي عن طفولته وحبه لخالة صديقه في الطفولة، وعن رأيه في طفولته، موضحا: طفولتي لم تكن كما أحب.
وقال أحمد حلمي خلال لقائه في برنامج AB TALKS الذي يقدمه الإعلامي أنس بوخش: عمري ما كنت أحلم في يوم من الأيام أن يكون معايا فلوس.. ومتخيلتش أني أنجح في ثانوية عامة وأني هبقى مشهور وعمري ما سعيت للحكاية دي.
وأضاف أحمد حلمي: أنا عمري ما عرفت أنا مين بحس أني تكويني كتلة من التناقضات كلها.. وسألت نفسي كتير مين أنا وموصلتش لحل.
طفولة أحمد حلمي
وعن طفولته، أوضح حلمي: طفولتي لم تكن كما أحب وكان نفسي أكون بعرف لغات وأكون بسافر كتير وأنا صغير، وحبيت خالة صاحبي وأنا عندي 6 سنين
وكانت ست كبيرة وفكرت ازاي أقوله، والواحد لما بيكبر كان نفسه يصغر.. وفي حاجات بتبقى عايز تعيدها تاني.
أحمد حلمي يتحدث عن والده
تحدث الفنان أحمد حلمي عن والده ووصفه بأنه أكثر شخص صانع أمل في حياته وذلك بسبب معاناة والده.
وأضاف: أنا كتبت إهداء لوالدي في الكتاب الوحيد اللي عملته وقلتله فيه ابي هل تراني كما اراك دوما في منامي”
وتابع ” وهو زي الشجرة اللي ماتت بس جذوره جوايا وهو بيصعب عليا لانه تعب وهو كان اكتر شخص صانع امل في حياتي بسبب معاناته وأن مفيش حاجة اسمها مستحيل وأن وجود ربنا جوة الإنسان مهم لأن كان معتدل ووسطي
وبيحب ربنا جدا وربنا كان بيحبه وعمري ما شفته غير راضي ولما فلوسه راحت حد جابله هدية ومش عايز اقول رشوة لكن هو طرده بالأدب ولما سألته قالي أن الشخص دة ليه مصلحة في الشغل وعايزه يمشيهاله”
وأضاف “وهو متأثرش لما فلوسه راحت وعمل عملية قلب مفتوح وخرج منها بأثر جانبي زي “الزغوطة” وفضل بيها 12 سنة ومكنش بيقدر يكمل جملة بدونها ودة شيء مؤلم ومكنش بيتعصب وكان بيقوم بطلبات بيته واحنا لو مش نايمين كويس بنبقى متعصبين وبعد كدة جاله ســ رطان”
واختتم حديثه عن والده قائلا “وبعد ما مات أنا اكتشفت أنه كان بيعمل خير كتير ومكنش قايل لحد عليها غير اخوه وانا ملحقتش اشبع منه علشان كدة نفسي ارجع صغير علشان اعيش معاه”
حب الشهرة والمال
وتابع: “في أوقات كنت بحب الشهرة خاصة بداية حياتي ولما الناس عرفتني في الشارع وبيتفاعلوا معايا، بس ما بقتش أهتم بيها أكتر ما بحب أعمل عمل فني كويس يبسطني ويبسط الناس، والشهرة خدت مني حاجات لها علاقة بحريتي”.
وأكمل: “علشان كنت في الحضيض، عمري ما كنت أحلم أو أتخيل في يوم من الأيام يكون معايا فلوس، ولا تخيلت إني انجح في ثانوية عامة والحمد لله نجحت
عمري ما حلمت يكون معايا فلوس وبقى معايا فلوس، ولا كنت أحلم بالشهرة وبعدين وصلت للشهرة والفلوس مش أهم حاجة في حياتي”.
علاقة أحمد حلمي ومنى زكي
وعن علاقته بزوجته الفنانة منى زكي، قال: “احنا متجوزين من 2002 وأهم شيء في نجاح الزواج وجعل العلاقة سعيدة إن الاتنين يوصلوا للغة تالتة مشتركة يفهموا بعض من خلالها، وأنا أشوف نفسي كأب كويس وأنا مش الأب العصبي ولا العنيف الجامد الناشف في تعامله مع ولاده”.
واختتم: “أكتر حاجة بصرف فلوسي عليها هي السيارات، وأنا الحمد لله إنسان سعيد”.
سر غياب أحمد حلمي عن التمثيل
قال الفنان أحمد حلمي: “ما أكثر الأفلام الخفيفة وهذا لا يعيبها، ولكني أبحث عن عمل جديد مختلف يلقى قبولًا من الجمهور، لذلك أنا غائب عن المشهد الفني منذ فترة لأنني لم أجد فيما أرغب في عمله”.
وأضاف : “أنا عايز أروح لحاجة مش الناس تقول عليها تقيلة لكن نفسي أبقى مبسوط وفرحان أوي بعملها، حاجة بتؤرقك نفسك تتكلم عنها شايفة آفة في المجتمع نفسك توصلها وتغيرها
ولو الوقت بيروح والدنيا زنقت هجيب عمل خفيف ورسالته الناس تضحك وتنبسط وهعمله”.
شاهد أيضاً:
