العالمي محمود المليجي.. سر مشهد أراده يوسف شاهين من مرة واحدة فعاده المليجي 7 مرات
مدرسة في الإلقاء، من منا لا يتذكر أداءه وطريقة وأسلوبه في المشهد الخالد من فيلم الأرض:”حاربنا سوا أيام الإنجليز وأيام السلطة، رحنا في عز البرد نحارب وشوفنا الموت بعينينا، ادفن مننا ناس في التلج، لأننا كنا رجالة ووقفنا وقفة رجالة، وفي ثورة 19 حاربنا مع سعد باشا، قطعنا السكة الحديد قدام الإنجليز، حاربونا وقتلونا ومات مننا ولاد، علشان كنا رجالة ووقفنا رجالة”، نعم هو النجم القدير الراحل محمود المليجي.
فيلم “الأرض” للمخرج الكبير يوسف شاهين من إنتاج عام 1970، والفيلم عن رواية الكاتب عبد الرحمن الشرقاوي، ويعتبر واحدًا من أهم أفلام السينما المصرية حيث أنه قد حصد المركز الثاني ضمن قائمة أفضل 100 فيلم في تاريخ السينما المصرية.
الفيلم من بطولة محمود المليجي ونجوى إبراهيم ويحيى شاهين وحمدي أحمد وعزت العلايلي وتوفيق الدقن، وتدور أحداثه في قرية مصرية خلال عام 1933.
العالمي محمود المليجي
تحدث المخرج الكبير الراحل يوسف شاهين عن أهم مشاهد فيلم الأرض التي تظهر قدرة وامكانيات المليجي قائلاً: بعد ما القطن باظ وشالو الحديد، بييجي محمد أفندي يحطله قرشين في جيبه والمفروض بعدها عينه بتدمع من خلال الاحساس بشكل طبيعي مش دموع احنا حنحطهاله.. أنا قعدت احضر في المشهد ده ساعة ويمكن زيادة وقلتلهم وحياة ابوكوا الشوت ده لازم يتعمل من مرة واحدة احتراما للراجل اللي حيركز بشكل مش طبيعي مش حينفع نعيد تصوير.
ويستكمل شاهين حديثه: ابتدت اللقطة وحمدي احمد حطله الفلوس ودخلت الكاميرا عليه كلوووز.. وبالمللي شفت لمعة العين والدموع بدأت تملا عين المليجي في الوقت اللي انا عايزه.. كنت مبسوط اوي بالمشهد وعمال اتنطنط بس لقيتهم بيقولولي معلش في حاجة زرجنت ولازم نعيد تاني.. يا نهار ابيض!!
وأردف شاهين حديثه: لسه بقوله يا محمود.. قالي انا ما بحبش التحدي ايه!! ايه المشكلة حعمل المشهد كمان مرة مالك عمال تشخط فيهم ليه.. ايه يعني؟! قلتله بس انا اتبسطت جدا بالمشهد ده يا محمود.. قالي ايه يعني حعمله كمان مرة.. وفي النهاية عملناه 7 مرات!! وكل مرة كانت الدمعة بتبقى مظبوطة بالمللي.
