هاجمت الفنانة فيفي عبده منتقدي الرقص، قائلة إن أي شخص يتحدث عن حرمانية الرقص فهو مخطىء فالرقص من وجهة نظرها ليس حراما.
وقالت فيفي عبده في أحد اللقاءات التليفزيونية: “الرقص حرام ليه؟ هو مش شغل زي أي حاجة الباليه حرام؟ في حاجات كتير حرام، الرقص دا شغل زي أي شغل ليه احترامه وليه ناسه اللي بيتفرجوا عليه وليه اللي بيقدروه ويحترموه”.
وعن فكرة ارتدائها الحجاب قالت فيفي عبده: “أنا متحجبة طول الوقت، الكلام دا يتقال للناس الفالته أنا بعتبر إني محجبة لأني مش بعمل حاجة غلط ومش بجيب في سيرة الناس محجبة في لساني وفي كل تصرفاتي، مطلوب مني إيه أكتر من كده وإذا كان على الشغل لو ربنا قالي في أي وقت إلبسي الحجاب هلبسه”.
وتابعت:” أجريت 37 عمرة ، وأديت فريضة الحج 5 مرات ، وهذه المرة الأولى التي يصرح فيها بذلك ، وأقول للمشاهدين لا تاخدوا بالظواهر ، وحاسه اني لو قابلت ربنا في اي وقت هكون مستريحة”.
المطربين المفضلين للفنانة فيفي عبده
قالت فيفى عبده عن المطربين الذين تحب أن تستمع لاصواتهم : “بسمع لناس كتير زي عبد الباسط حمودة وبهاء سلطان والليثي ورضا البحراوي في ناس حلوة بتغني بجد، وفي مدحت صالح كمان وغنينا مع بعض دويتو زواوي يا اخويا في مسرحية “حزمني يا” بحب الأغنية دي أوي كان دويتو جميل”.
فيفي عبده تكشف تفاصيل لقاءها بخبيرة أبراج
تحدثت الفنانة فيفي عبده عن فكرة الموت مؤكدة أنها لا تخاف منه، لكنها في نفس الوقت تتمنى وتدعوا الله في كل صلاة أن يمد في عمرها وتعيش لـ100 عام.
وقالت فيفي عبده:” مش خايفة من الموت وشفت تربتي وموضباها لكن نفسي ربنا يديني عمر شوية لأني لسه معشتوش، كل ما أركع وأصلي أقوله يارب إديني شوية عمر عايزة أعيش أكتر من كده عايزة أعيش 100 سنة مثلا”.
وتابعت فيفي عبده: “ليلى عبد اللطيف خبيرة الأبراج قالت إني هعيش لـ80 سنة قابلتها في الطيارة قلت لها مش عاجبني الـ80 دول هل من مزيد؟ خافت مني قالتلي خلاص 90، العمر بإيد ربنا، نفسي أعيش 100 سنة أشوف اللي بحبهم أشوف وأعيش مع أحفادي”.
وأوضحت فيفي عبده أنها لا تخاف أو تفكر كيف ستواجه الله سبحانه وتعالى قائلة: “مواجهة ربنا أنا مطمنة طول عمري ماشية بما يرضي الله مظلمتش حد بساعد الغلبان أنا غلبانة زيهم، إنسانة واضحة كل دي حاجات تخليك تبقى مطمن في الحياة، لكن ربنا هيعمل فيا إيه أنا راضية بكل حاجة، ربنا يهديني لو جاتلي الهداية هقولها إيه لأ كخة”.
سر لجوء فيفي عبده لطبيب نفسي وابتعادها عن السوشيال ميديا
أما عن سر غيابها عن السوشيال ميديا قالت فيفى عبده : “أنا عارفة إني واحشاكوا الفترة الأخيرة مكنتش بظهر علشان الأحداث اللي حصلت دي في غزة اللي خلتني تعبت نفسيا لدرجة إن الدكتور بتاعي قال ودوها لدكتور نفساني وربنا يهدي الدنيا أنا رجعتلكم من تاني”.
آخر أعمال الفنانة فيفي عبده
جدير بالذكر أن آخر أعمال الفنانة فيفي عبده كان في دراما رمضان 2022 من خلال مشاركتها في مسلسل “شغل في العالي”.
وشاركها في بطولته فيفي عبده وشيرين رضا ومروان يونس، بجانب عدد من ضيوف الشرف من بينهم بيومي فؤاد، ونضال الشافعي، ونجم كرة القدم ميدو، والعمل من إخراج مرقس عادل، وتأليف حسين مصطفى محرم.
