ظهر الفنان بيومي فؤاد وأسرته في برنامج “صاحبة السعادة”، مع الإعلامية إسعاد يونس، في الظهور الأول له بعد أزمته الأخيرة مع الفنان محمد سلام.
أول تعليق من بيومي فؤاد بعد أزمته مع محمد سلام
قال بيومي فؤاد: أنا راهنت على تاريخي وحب الناس ليَّ كتير وضغطت على الناس أوي من منطلق مش حلو أوي يا بيومي بس احنا بنحبك ومسامحينك وما تعملش كده تاني، مرة شخص قال لي إيه يا أستاذ اللي أنت عامله في العمل ده فقلت أنا آسف ومش هعمل كده تاني، وأقسم بالله عمري ما اشتغلت علشان الفلوس واللهم لك الحمد ولادي متربيين على إن فيه فلوس تمام مفيش تمام.
بيومي فؤاد يهاجم محمد سلام
هاجم الفنان بيومي فؤاد، الفنان محمد سلام، بعد اعتذار الأخير عن عدم المشاركة في مسرحية “زواج اصطناعي”، في موسم الرياض بالمملكة العربية السعودية، حيث ظهر بيومي في في فيديو عبر موقع تبادل الصور والفيديوهات “إنستجرام”، قال فيه: “من حقك أنك تعتذر عن المسرحية، لكن مش من حقك أنك تغلط في فنك.. إحنا ما بنجيش عشان نضحك حضراتكم.. إحنا بنقدم فننا المصري، وإنتم بتحترمونا وإحنا بنحترمكم جدا.. شئ عظيم إن أنا أخرج وإتصور مع شاب سعودي أو سيدة سعودية، وهي تعلم أن أنا مصري فأنا بشرف بلدي”.
تابع: محمد أنور راجل وأنقذ موقف وكان قدها.. وأنا فنان مصري وليا الشرف.. جيت المملكة العربية السعودية وليا الشرف.. إحنا بنتعب وبنقدم فن ولو الموضوع كدة ف في فنانين كتير من أيام نجيب الريحاني المفروض ينتحروا”.
أزمة بيومي فؤاد ومحمد سلام
كان محمد سلام قد رفض التعليق على فيديو النجم بيومي فؤاد، الذي ظهر خلاله الأخير وهو يهاجمه بسبب اعتذاره عن مسرحية”زواج اصطناعي” التي تعرض حاليا ضمن موسم الرياض.
الحالة الصحية للفنان بيومي فؤاد
قال بيومي فؤاد :كان عند مشكلة في أعصاب رجلي من الوقفة البسيطة، ولما يكون في مشهد واقفين 7 دقائق، بيحصل تنميل في أعصاب رجلي وبعد كدة بدأ الموضوع يزيد، مبقتش أكمل دقيقتين لازم أقعد، فيه طبيب شرح لي ما يحدث، قال لي في وجود مشكلة في آخر ظهرك بتؤثر على رجلك وتعمل تنميل في رجلك.. كنت مش قادر أقف ولازم أسند على حاجة، وطول ما أنا ساند على حاجة الألم بيخف وقررت أسافر عشان أشوف موضوع رجلي ولكن معرفتش
ظهور خاص لأسرة الفنان بيومي فؤاد
وقال الفنان بيومي فؤاد:”مراتي وأولادي أكبر نقاد ليَّ، أنا عايش معاهم وفيه حاجات تنجح جماهيريًّا وتحقق إيرادات وهمَّ بيلوموني عليها يا إما شايفني بكرر نفسي وأنا أحيانًا بزعل منهم بس أنا متأكد أنهم حابين ليَّ الخير، ولكن الحقيقة أنا للأسف الشديد فيه أعمال كتير بعملها وأنا غير راضي عنها وفيه أعمال بروحها على أساس أنها يوم واحد فألاقي إني بطل العمل وبعدين أفاجئ إنهم يحطوني 30 مشهد في اليوم سينما مش دراما”.
زوجة بيومي فؤاد تكشف تفاصيل الارتباط
كشف الفنان بيومي فؤاد، عن كواليس زواجه من السيدة أمانى سويدان: أمانى انضمت لأحد الورش، وكانت شاطرة، ولكن مكملتش تمثيل، ومش عارف كنت مستصغر نفسى عن الارتباط، وكان في دماغى أن اعتذر لها، لانها محترمة، ومش في دماغى، ولكن الكلام تغير على لسانى وعرفتها بنفسى، وساكنة فيه عشان أتقدم ليكى وكنت حاسس بحاجة من ناحيتها.
وأضاف:كنت بعمل بروفة لمسرحية في الكلية، وكان عندى شغل في الحكومة، ولما سألت عنى قال لها راح المنصورة يتجوز، وراحت عيطت، وقالت له أنا من المنصورة، وكانت العلاقة ما بينا جميلة، ومش كاره خالص أن بنتى تقول مش معجبة بحد ومفيش مانع أن بنتى تقول لي بأحب الولد، ولكن لو الولد خذلها مفيش مانع، وهتتعلم”.
وكشفت السيدة أمانى سويدان، زوجة الفنان بيومى فؤاد، عن تفاصيل ارتباطهما: شوفت بيومى في المسرح، وكان عندى فضول استكشفه، ومرة من المرات بشوفة بيصلى، وفى الركعة الثانية سجد في قلبي، وقلت بحب الراجل ده قوي، ورحت البيت حكيت لهم، وهيتقدم لي وكان ده جنان، وحاجة مش طبيعية”.
