تصدر الفنان أحمد عز محركات البحث جوجل بعدما كشف عن تفاصيل حياته الشخصية وكواليس دخوله الوسط الفني، ورد فعل عائلته بعدما قرر ترك عمله والالتحاق بالتمثيل.
قال أحمد عز خلال حواره في برنامج بودكاست: كنت شغال موظف استقبال في فندق كبير وقعدت أترقى لغاية ما وصلت أني أمسك المبيعات وأبويا مكنش شايفني ممثل هو كان شغال في البترول، وكان عايزني أكمل طريقه في نفس المجال.
وتابع: كنت بعمل إعلانات وجت مدام إيناس الدغيدي قالتي إنها بتعمل فيلم مذكرات مراهقة وعايزة شاب وبنت جداد للفيلم، أنا وافقت وطلبت إجازة من الشغل رفضوا، وقالولي قدم استقالتك لو هتمثل.
أحمد عز يستقيل من العمل بسبب التمثيل
أمد أحمد عز انه تقدم باستقالته من العمل وكنا في رمضان، وإحنا على الفطار ولما عرف أبويا بالقرار ساب الأكل.
واضاف: عملت الفيلم وبعدها قعدت سنة ونص من غير شغل، وكان عقاب أبويا ليا إنه قال للكل محدش يديلي فلوس لغاية ما رجعت اشتغلت.
سبب خوف أحمد عز من المرض
تحدث الفنان أحمد عز، للمرة الأولى عن تجربة والدته مع مرض السرطان ووفاتها بسببه، وإن هذه القصة المؤلمة أدت لإصابته بفوبيا المرض.
وأضاف أنه كان الوحيد الذي يعلم بمرض والدته قبل وفاتها لأنها طلبت منه عدم إخبار إخوته ووالده بما أصابها.
وأكمل أن والدته كانت حريصة على تسيير الحياة بصورة طبيعية رغم معاناتها مع السرطان قائلا: كانت مدورة البيت عادي، تروح تاخد جرعة الكيماوي من غير ما حد يعرف وترجع البيت تطبخ وتأكلنا.
واستطرد: قربه الشديد من والدته جعله مطلع على جميع مراحل المرض، وبعد وفاتها جاتلي حالة من الاكتئاب والقلق من شوية صداع، والمتلازمة دي فضلت معايا.
وأكد أحمد عز أنه يخاف جدًا من المرض وأول ما يجي لي برد كإني عيل صغير بيعيا، ده طبع والواحد هو اللي بيظبط عقله للتأقلم معاه شوية بشوية، إنما مش هيروح.
وأضاف: أنا والله معرفش البنات بتحبني ليه، وحب الناس ده لو دفعت فيه ملايين وطلعت تعيط على السوشيال ميديا وتقول أنا بحبكم وأنا شقيان، مستحيل، أنا أبسط وأخيب في التعامل مما تتخيل.
تابع: موضوع إن أنا كنت مستحلي نفسي عمل لي عطلة في بدايتي، وبقيت أعمل الحاجة اللي شبه الناس وأنا منظم أوي في المواعيد والوقت، وده الموروث اللي أخدته من أبويا وحياتي الشخصية متهمش حد، واللي يهم الجمهور أن أعمل فيلم ومسلسل وإعلان كويس.
أحمد عز يغيب عن دراما رمضان 2024
يغيب الفنان أحمد عز عن السباق الدرامي في رمضان للعام الثاني على التوالي وكانت آخر مشاركاته الدرامية مسلسل «الاختيار 3» والذي تم عرضه في موسم رمضان 2022 من بطولة ياسر جلال وكريم عبد العزيز وأحمد السقا ومن إخراج بيتر ميمي.
