خلال الفترة الأخيرة، شنت الإعلامية مروة صبري هجوماً ضد الفنانة مها أحمد، بعد قيام الأخيرة قيام الأخيرة في الدخول في تحديات عبر منصة تيك توك.
وفور علم الفنانة مها أحمد بذلك، سرعان ما فتحت النار على الإعلامية المصرية شقيقة الفنانة عبير صبري، قائلة:” مش عارفاها شغاله فين .. أوه افتكرت .. في مرة كلمت ابني قالتله عايزة تعمل معايا حوار في الراديو ولما قابلتها لقيتها بتترعش .. وقولت لمدير أعمالي مين دي يا بني اللي انت جايبهالي دي .. مبتعرفش تقول كلمتين على بعض”.
ورداً على تصريحاتها بأتهامها لها بإهانة الفن، قالت مها أحمد:” أنا دلوقت لو كنت في بداياتي عملت أفلام إغراء .. ورضت بالقبلات في السينما عشان أتشهر كنت مش ههين الفن.. من الأخر اعتقد إنها بدل ما تاخدني كماتريال انها تتشاف من خلاله .. عندها ماتريال كتر أوي لو بحثت على اليوتيوب وكتبت اسم أختها.. هتطلع تريند أكتر عن كلامها عني”.
وتابعت :” أي حد هيتعدي حدوده عليا ، على جوزي ، على أولادي .. هلجأ للقضاء”.
مروة صبري وبداية خلافها مع مها أحمد
شنت الإعلامية مروة خلال برنامجها “قعدة ستات”، هجوماً ضد الفنانين الذين يظهروا على منصة التيك توك، قائلة:”الممثلين اللي بيطلعوا في تحديات، أنتوا مين؟، بجد أنتوا مين؟، أنتوا لا تنتموا للفن المصري، أنتوا لا تنتموا للفن أصلا”.
وتابعت: “كان في فيديو لشخص طالع مع مها أحمد في تحدي على لايڤ تيك توك، وبيقول لها واضح الفن ما بيأكل خبز، فهي قالت له: الفن لا يأكل خبز، إحنا طالعين نشحت ونتسول على التيك توك واللايف، أنا طالعة أكسب علشان مابيجيليش أدوار”.
وقالت مروة: “هو ده ينفع، حتى وإن كانت دي نيتك هل ينفع تطلعي تقولي كده، كفاية يا جماعة شماعة الفن اللي أنتوا قاعدين تعلقوا عليها أخطائكوا والكوارث والمصايب اللي أنتو بتعملوها، أنتوا بتهينوا الفن”.
وأضافت:”أنتِ لو عملتي دورين تلاتة وسايبين علامة مع الناس أنتِ كده بتخسريهم، أنتِ بتمسحي تاريخك بأستيكة، ومها أحمد اسم مش قليل، مها نجمة من النجوم ولما تطلعي تقولي الفن مبيأكلش عيش وإحنا طالعين نشحت، حتى لو ده بيحصل أعملي أي حاجة تانية إلا إنك تظهري بالمشهد ده قدام الناس”.
مها أحمد تشارك زوجها عمل سينمائي بعد غياب 12 عاماً
تعود الفنانة مها أحمد للسينما بعد غياب 12عاماَ عن جمهورها ومتابعيها، بفيلم كوميدي تتعاون فيه مع زوجها الفنان مجدي كامل.
ومن المقرر أن يتم تصوير العمل خلال الفترة المقبلة مابين الإمارات ومصر، وحتى الأن لم يتم الإعلان عن كافة النجوم المشاركين في العمل، سوى الفنان مجدي كامل، الذي تعاقد على العمل خلال الأشهر القليلة الماضية.
وكانت أخر أعمال مها أحمد في السينما فيلم “شارع الهرم”، الذي عرض في عام 2011، وتعاونت فيه مع سعد الصغير ودينا، ومجموعة اَخرين من الفنانين.
