لم يمر سوى أيام قلائل على تكذيب الفنانة بوسي للتصرحات السابقة للفنان سعد الصغير بأنها رفضت مساعدة والدها الراحل، ليخرج سعد الصغير عن صمته مؤكداً كذبها.
قال سعد الصغير رداً علي اتهامات بوسي له، قائلا:”أنا مدفعتش لأبوها فلوس علشان أحاربها، وأنا واقف معاها بقالي 10 سنين”.
وأضاف :” أنا اتدخلت بينها وبين أبوها عشان بتربطني علاقة قوية بأسرتها، دا احنا كنا بنخلص شغل الهرم وننام عند بوسي، لأن عندها فيلا دورين، عشان كده اتدخلت بينها وبين أبوها حتى تقول له يابا أنا سامحتك”.
وتابع:” والدها ظهر معي في البرنامج لأني أنا اللي كنت بجيله، والمصحف ما كانت بتكلمه كان عاوز 4 آلاف جنيه عشان يعمل عملية في عينيه وأستاذ عمرو الليثي اللي عملهاله، وعلاقتي ببوسي بدأت منذ سنوات طويلة، وأنا اللي جيبت لها أغنية آه يا دنيا”.
وأضاف:” قلت لوالدها أنت تسببت في إيذاء بوسي، مكنتش لاقية تأكل وأنت بتروح تسهر والواحد مش عاوز يتكلم”.
وأكمل:” أبوها آه غلط في حقها، لكن والمصحف ما كانت بتبعت له جنيه، ولا كانت بتدي لأخواتها حاجة، واشتريت له بـ250 ألف جنيه تكييف وشاشات وغيرها وذلك من تبرع فاعل خير، لأنه كان يعيش في خرابة، ولو هو تمام وعندها دم تطلع الـ250 ألف جنيه لله، لكن هي أخدت الشقة بالعفش اللي إحنا جايبينه، وهي شقة والدتها، والمفروض تدينا الحاجة اللي جبناها لأبوها”.
سعد الصغير يكشف عن ضرب بوسي لطليقها
كشف سعد الصغير سر الخلافات بين بوسي وطليقها ووالد نجلها الوحيد وليد فطين، قائلاً: “بوسي اتصلت بيا وقالت لي الحقني وليد فطين ممضيني على 28 إيصال أمانة، ورحت لها المحكمة وهي عليها 30 إيصال أمانة، بوسي راحت جابت فطين كتفته وجابت ناس وضربته 13 مرة بالشبشب على وشه”.
وأكمل الصغير: “الراجل كان ليه 4 مليون جنيه أديته مليون جنيه وبعد كدا جت شارع الهرم قالت له أمك في العش ولا طارت، وبعد كده حبسته ولما حبسته اضطر يقدم ايصالات الأمانة “.
واستطرد الصغير:” مكنش المفروض تحبسه، وأنا قولت قدام السبكي والليثي إن بوسي هي اللي حبست وليد فطين واعترفت بده، هو ظلمها بس مينفعش تحبسه كانت تقوله اتكل علي الله وتسيبه”.
بوسي تنفي أكاذيب سعد الصغير
في لقاء سابق بنفس البرنامج، علقت بوسي علي قصة سعد الصغير وسر اهتمامه بوالدها قبل وفاته، علقت بوسي: “أنا معرفش هو عايز مني إيه، وسمعت مرة إنه اتجوزني وده مش صح طبعا، وعايز أسأله أنت عايز مني إيه وبتحاول تعمل شو ولا بروباجندا ليه؟ أنا لحد دلوقتي عاملة بالعيش والملح وإننا كنا أصحاب وإخوات زمان وبقوله ليه مركز في حياتي أكتر مني وبتصدق يطلع على أي كلمة”.
وأكدت: “عمري ما قصرت مع أبويا، والدي للأسف عمره ما كان معانا في حياتنا وكانوا بيستغلوه ضدي وبيدفعوا فلوس ويتكلموا معاه علشان يحاربوني به، أبويا كان طماع وكلمته كتير وقلت له بلاش فضايح وأديله فلوس تاني يوم يقول بنتي رامياني ومش بتصرف عليا، أنا منعت الفلوس عنه لما طلع قال بنتي بوسي مش بتصرف على وأنا معملتش فيه حاجة وحشة”.
