كشف الفنان هشام ماجد العديد من الأسرار خلال استضافته ببرنامج “أسرار” الذي تقدمه المذيعة أميرة بدر عبر فضائية النهار، متحدثا عن علاقته بشيكو وأحمد فهمي، وسر انفصال الثلاثي فنيا، كما تحدث عن بدايته الفنية.
قالًا: “في بداية الدخول عالم الفن بفيلم ورقة شفرة، كلنا كنا نعمل في وظيفة أخرى مختلفة، ثم أعطانا المنتج محمد حفظي أول فرصة بدأناها في “أفيش وتقفيش”، كنا نتقاضى في الحلقة على الكتابة 800 جنيه وفي التمثيل 300 جنيه، وفي هذا الوقت كان شيكو رافضا استكمال العمل معنا لأنه كان يريد الاستمرار في عمله كمهندس، وهو كان عنصر مهم جدا، وهو أقوى واحد بيننا في التمثيل”.
أما عن سبب الانفصال الفني للثلاثي، وقرار الفنان أحمد فهمي بالابتعاد، قال هشام ماجد: “إحنا أصحاب من الجامعة، ولما جينا نعمل “الرجل العناب” فيلم، بعد ما عملناه مسلسل، اتفقنا إن أحمد فهمي هو اللي هيكتب ومعه شريف نجيب بس، عشان ميحصلش مشاكل”.
وتابع: “لما فهمي كتب الفيلم، أنا وشيكو كان عندنا اعتراضات، وفهمي شاف إن ده عدم تقدير له، فاتخانقنا في الجزء ده، وقررنا إننا منعملش الفيلم سوا، وفهمي قرر إنه ينفصل ويشتغل لوحده”.
وأكمل: “كان بقالنا كتير بيحصل خناقات بس ومبتبانش للناس، وطول الوقت كان فيه اختلافات، ومفيش فرقة مبيحصلش فيها اختلافات، ومحدش بيكمّل وقليل اللي بيكمّل”.
وعن علاقته بشيكو، قال: “كنت أنا وشيكو برضو بنتخانق بس مبتوصلش إننا ننفصل، وممكن نشتغل مع بعض إحنا التلاتة، بس مش هنرجع نبقى فرقة تاني، لأن خلاص كل واحد عمل شغل لوحده ونجح”.
