نشر المخرج محمد سامي منشورًا له على موقع تبادل الصور والفيديوهات “إنستجرام” يسترجع فيه زكرياته مع الفنان تامر حسني ويُرجع الفضل له بعد الله في ما وصل إليه من نجاح خلال مسيرته.
حيث قال: “وَلَا تَنْسَوُا الْفَضْلَ بَيْنَكُمْ
و أنا قاعد إمبارح في التصوير افتكرت الرحلة و الشقي و التعب من أول عمل لحد العمل اللي بصوره دلوقتي و افتكرت صعوبة الحصول علي فرصة عشان الواحد يثبت نفسة و يحقق أحلامه، فطبعا افتكرت أخويا و صاحبي الجدع الطيب الخلوق اللي دعمني من أول لحظة و كان سبب في اللي أنا فيه دلوقتي،
تامر قدملي كل الدعم و الحب و الامكانيات اللي خلتني اثبت نفسي وبالذات في وقت كان صعب الشباب ياخد في الدرامة فرصة بحجم مسلسل آدم، فاكر اني الكل كان رافض اني اخد الفرصة دي ومستكبرينها عليا الا هو وقف في ظهري كأنه بيحارب لأخوه و بصلي مرة والظروف كلها ضدي و كنت حاسس وانا بحضر انهم هيجيبو حد غيري و قاللي ده مسلسلك و هتعمله و هتنجح و هتنجحنا معاك،.
حتي طريقته المتواضعة و هو بيقوللي مسلسلك كأني عامل تسع مسلسلات قبله تحسس الواحد بنفسه و أهميته ، أشهد أمام الله إنك طول عمرك متواضع و مؤدب وتطلب الحاجة باحترام، ومع الكرو محترم وعشان كدة كلنا روحنا فيك، بحبك يا صاحبي و تستاهل كل حاجة حلوة يا أجمل قلب، ويا رب يرزق كل الناس باللي يساعدهم علي تحقيق أحلامهم زي ما رزقني بتامر حسني”
رد الفنان تامر حسني على رسالة الفنان محمد سامي له وتذكره ما فعله معه في بداية مشواره مع الإخراج وتعاونهما في مسلسل “آدم”.
وكتب تامر حسني تعليقا على منشور محمد سامي: “يا سامي يا حبيبي يا ابن الناس الطيبين شكرا من كل قلبي على كل حرف خارج من قلبك كتبته في حقي، خلتني أدمع يا سمسم ، أولا أنا صدقت موهبتك من وانت صغير سنا لإنك فعلا موهوب موهبه مش عادية وتاريخ نجاحاتك يشهد بكده، كنت عارف وأنا بقدمك إني بقدم مكسب حقيقي للصناعة ومن يوم ما سجلت رقمك على تليفوني وهو مكتوب سامي ابني، عشان كان إصراري على تقديمك كان بقلب أب مش صديق من سنك أب مصدق في ابنه وعارف إن الناس مش هيدوله فرصة يطلع عشان سنه صغير”.
وتابع تامر حسني: “الحمدلله برحلتك ورحلتي أثبتنا للدنيا إنها مش بالسن لأ !!!!… بالمجهود والتعب والشطارة والمذاكرة وانت كل الصفات دي كانت فيك وأنا لوحدي اللي عارف، عشان كده صممت إن الدنيا كلها تعرف معايا حجم موهبتك الحقيقي، حتى أعمالي اللي من إخراجك ليها مكانة خاصة في قلوب الناس”.
وأكمل تامر حسني: “مسلسل آدم، فيلم أهواك، فيلم تصبح على خير
ولسه إن شاء الله نجاحات جايه مستنيانا مع بعض، ربنا يوفقك يا حبيبي في كل شغلك اللي جاي وتكسر الدنيا وفي القمة زي عادتك، يا محمد شكرا تاني على البوست الصادق ده شكرا يا أصيل يا محترم، ربنا يخلينا دايما لبعض ضهر وسند”.
