الفنانة المصرية ماري منيب، لم تكن أشهر من قدم دور الحماة في السينما المصرية فقط، ولكنها قدمت العديد من النصائح لسيدات البيوت، وكانت أول فنانة في ذلك الوقت تقدم مثل هذه النوعية من النصائح.
ماري قالت، بلهجتها الكوميدية الشهيرة، إن من واجب الست، الاهتمام بمكافحة الذباب لأنه بينقل كل الأمراض المستعصية.. وبلاش أمراض.. بقى الدبانة تقف اسم الله على مقامكم على الحاجة الوحشة كلام في سركم، وبعدين تيجي على حد تاني!! يا ساتر!.
وأضافت: “لازم أراعي بيتي بنظري إن كنت ست غنية، وأراعيه بإيدي إن كنت ست متوسطة، وبكده أضمن صحتي، وصحة جوزي وأولادي.. وفيه عشرة وصايا، لو قدرتي تنفذيهم تضمني أنك حافظت على بيتك، وتكوني في الوقت نفسه اشتركت في حملة مكافحة الذباب”.
أولًا: حطي على الشباك ستاير سلك بين الخشب والزجاج، والشباك الواحد ما يكلفكيش أكثر من خمسين قرش، ويعيش معك العمر.
ثانيًا: فيه حاجة اسمها فليت لتنظيف البيت من الذباب، والصفيحة كلها بـ18 قرش، وتقعد عندك شهر.
ثالثًا: الزبالة موش لازم تتوجد في البيت مطلقًا، لازم يكون عندك زبالة بغطاء محكم بستين أوسبعين قرش، تعيش معاكي سنتين ثلاثة.
رابعًا: لازم تكوني نظيفة في بيتك مش العيال ياكلوا البرتقال، ويرموا القشر على الأرض، وييجي الطير يقف عليها.
خامسًا: اقفلي الشبابيك واتركي جزء صغير منها مفتوح، وهشي الدبان فيهرب في الحال، لأنه ما بيحبش الضلمة.
سادسًا: متسيبيش اللحمة والخضار جنب الشبابيك المفتوحة، علشان ميقفش عليها الدبان، وكذلك ما تهويش الحلويات في جو مكشوف إلا إذا كنت عاملة احتياطاتك.
سابعًا: إذا كان عندك كلاب أو قطط، تنضفيها وتحميها أول بأول، موش تسيبي الطير يقف عليها، وعلى فلذات كبدك اللي بيلعبوا معاها.
ثامنًا: وكله كوم والمجاري العمومية كوم، لو انسدت عندك بلاعة لازم تصليحها في الحال، وتلاحظي دورة المياه باستمرار، أو تنظفيها بنفسك إذا لزم الأمر.
تاسعًا: وما تسمحيش للأولاد أبدا أنهم يشتروا جيلاتي أو دندرمة من العربيات اللي بتدور في الشارع، لأنها مليانة أمراض وميكروبات والدبان دايمًا حاطط عليها.
عاشرًا: إذا كان في طريق بيتك بعد كده مستنقعات أو خرايب أو مقالب زبالة، بلغي الصحة أو الجهات المختصة في الحال، علشان تساهمي في حملة مكافحة الذباب، وتحفظي بلادك من هذا الوباء.
