نشرت أسما شريف منير تعليقا عبر حسابها على موقع التواصل الاجتماعى “إنستجرام”، تعلن فيه بيع سيارتها من أجل الدخول فى مشروع جديد.
وقالت أسما شريف منير: “قررت أشارككم رحلتي اللي ببدأها من الصفر للمرة الثالثة في حياتي، كنت فاكرة إني هنزل الفيديو ده بعد سنين كتير بس قلت أكون معاكم خطوة بخطوة، وعايزاكم تكونوا جزء منها”.
وأضافت أسما شريف منير: “أنا بقالي 15 سنة مسئولة عن نفسي، طبعًا لما بنهار خالص أبويا بيلحقني بس بعيد عن كده ده قراري، إني أكون مسئولة عن نفسي.. المهم قررت بعد رحلة طويلة من الهيلنج والشغل على تطوير نفسي، إني إحقق حلم كنت بحلم بيه من زمان أوي”.
وتابعت: “كان دايمًا فيه ناس بتحاربني وبتعطلني إني أحقق حلمي في الشركة دي وكم الناس اللي أحبطتني وقالت لي بلاش ومش وقته وهيحاربوكي، انتي عبيطة في حد يبيع عربيته في الغلا ده، مش هتعرفي تجيبي عربية تاني”.
وأوضحت أسما شريف منير: “أنا صممت عشان مؤمنة بحلمي وعادي إني أتكسف شوية وأبني تاني زي ما بنيت أولاني وتاني، أنا مقتنعة إننا إحنا اللي بنعمل الفلوس مش هي اللي بتعملنا، والرزق متقسم ومحفوظ فاللي يحارب يحارب واللي يحبط يحبط، وأنا مكملة، عمرو مؤمن زيي بالظبط وعنده نفس حماسي وحلمي فقرر يجازف هو كمان ونبدأ مشروعنا بكل طاقتنا وبكل حاجة جوانا من طاقة.. كملوا معانا الرحلة لسه في تفاصيل كتير”.
أسما شريف منير تحلق شعرها
أسما شريف منير أثارت جدل كبير خلال الفترة الماضية علي مواقع السوشيال ميديا وذلك بعد نشر فيديو لها وهي تحلق شعرها تماما.
وكان ظهورها الأول، وهي حليقة الرأس، بمهرجان القاهرة للدراما بمدينة العلمين الجديدة.
وعلقت: “شعري بقاله فترة بيقع جامد، ده غير ان من كتر العمايل اتحرق و بقى مش صحي خالص، قررت أنفذ قرار كان بقالي كتير اوي نفسي أخده، ابدأ من جديد، أحرر نفسي، أفتح صفحة جديدة، حقيقي هو قرار صعب جدا بس حسسني بقوة و تفاؤل، رميت ورايا حاجات كتيرة اوي بمجرد اني شيلت شعري، قلبي كان بيدق جدا و بعديها حسيت اني أنا مليانة أدرينالين.. خطوة جريئة و مرعبة بس حاسة اني طلعت منها بدرس”.
وتابعت: “عارفة أن فيه ناس كتير هتهاجمني بس أنا فارق معايا احساسي بالراحة اللي أنا حساها دلوقتي… عادي هيطول تاني بس الاحساس ده مش هحسه غير مرة.. بكرة هتشوفوا النتيجة الأخيرة”.
أسما منير اعتادت الجدل بسبب شعرها
اعتادت أسما منير أن تتصدر محركات البحث ومواقع التواصل الإجتماعي خلال الساعات الماضية في محاولة منها للبحث عن التريند بعد ظهورها بـ”لوك” مختلف وسط تفاعل الجمهور والمتابعين.
ونشرت أسما شريف منير صورة عبر صفحتها على موقع التواصل الاجتماعي لتبادل الصور والفيديوهات القصيرة إنستجرام وظهرت في الصورة بإطلالة متميزة وبشعر طويل الأمر الذي أثار دهشة الجمهور.
كشفت أسما شريف منير أن كل مرة الصلاة بتريحني ودلوقتي بحاول، ونفسي انتظم على الصلاة لغاية ما أموت، المفروض الواحد يلتزم في الصلاة الأول وبعدين يغطي شعره.
وأبدت أسما شريف منير رغبتها في ارتداء الحجاب قائلة: نفسي أعمل كده وربنا يهديني للحجاب، أنا خايفة أعمل حاجة تكون مثال مش كويس للحجاب، ودايمًا الواحد لما بيبدأ في الخيط الأولاني ومينفعش تنفره في الحاجة دي، ولازم دايمًا لما تشوف حد بيعمل حاجة ساعده وادعيله بالهداية، ولو أنت شايف حد أبو لهب افتح نفسه على الدين، واقتضى بالرسول عليه الصلاة والسلام.
وأكدت أسما أنها أصبحت لا تخشى الموت بعد انتظامها في الصلاة وتقربها من الله خلال الأيام الأخيرة.
أسما شريف منير تحلق شعرها “زيرو” للمرة الثانية
فاجئت الإعلامية المصرية أسما شريف منير الجمهور مرة ثانية بحلاقة شعرها “زيرو” من جديد، بعدما سبق وأزالته بالكامل في مناسبة سابقة.
ونشرت أسما شريف منير عبر خاصية “ستوري إنستجرام” مقطع فيديو ، وهي حليقة الرأس بالكامل، مشيدة بقصة شعرها الجديدة.
وقالت الإعلامية المثيرة للجدل: سعيدة باللوك جدًا.. أشعر براحة غير عادية.. قلت يجب أن أتخلص من شعري
ورغم الانتقادات الكبيرة التي واجهتها أسما عبر السوشيال ميديا، لكن والدها الفنان شريف منير وابنتها لارا السكري دعموها وأكدوا على حريتها.
أسما شريف منير تقتحم عالم التمثيل
وكانت أسما شريف منير كشفت في تصريحات محلية نيتها اقتحام مجال التمثيل خلال الفترة القادمة بعد الشهر الكبيرة التي حققتها عبر مواقع التواصل الاجتماعي، وقالت: بدأت في تلقي ورشة تمثيل مع مدرب التمثيل أحمد تمام والكوتش عمرو جمال ، وهذا سبب ابتعادي عن السوشيال ميديا خلال الفترة القادمة ، لقد كنت مترددة تجاه هذه الخطوة لخوفي منها ، ولكنني قررت أن أخوضها بعد التدريب والتعلم بشكل جيد دون تسرع.
