هددت الفنانة منى فاروق بالانتحار في بث مباشر، عبر حسابها على موقع الصور الشهير «إنستجرام»، مؤكدة أن جميع الأبواب مغلقة أمامها بعد قضيتها الشهيرة.
وقالت، في تصريحاتها، إنها لم تعد قادرة على مواجهة أعباء الحياة المكلفة في دبي، خاصة أنها بدون عمل منذ أكثر من شهر، كما أنها غير قادرة على العودة إلى مصر لأن الكل يتعامل معها كمنبوذة.
ودخلت «فاروق» في نوبة بكاء وقالت: «أنا مش لاقية شغل خلاص في أي مكان، سواء جوة الوسط أو برة، وعايشة في دبي ومش قادرة على العيشة هنا علشان غالية.. ومش قادرة أرجع مصر علشان نظرات الناس..».
تابعت: «وصلت لدرجة من اليأس اللي هييجي في مرة وأنتحر.. عاوزة آكل بالحلال مش عاوزة أعمل حاجة غلط وعايزة أعيش حياة جديدة».
وأضافت: «الفرق بيني وبينكم، إن ربنا شال ستره من عليا لكن إنتم لسه، أنا نفسي أرجع أعيش سليمة تاني محدش بيطبطب عليا بقيت لوحدي مقداميش حل غير الموت».
تعاطف عدد من نجوم الوسط الفني ورواد مواقع التواصل الاجتماعي مع الممثلة المصرية منى فاروق، وقال شريف منير: “عزيزتي الفنانة منى فاروق، ربنا غفور رحيم. وأعتقد ناس كتير مسمحاكي.. ومتعاطفة معاكي.. وأنا منهم.. لا تيأسي كل حاجة بتعدّي وياما ناس غلطت أكتر منك وعدّت على خير.. وعايشين بينّا وبيشتغلوا والناس نسيت”.
وتابع شريف منير: “ماتقسيش على نفسك أوي كده.. منتظرك علشان أمثل معاكي”.
وتضامنا مع الممثلة المصرية في أزمتها غرّد المخرج أكرم البزاوي قائلا: “أنا مع كل واحد بيدعم الممثلة الموهوبة والجميلة منى فاروق.. ومن كان منكم بلا خطيئة فليرمها بالحجر.. لو بإيدي هساعدها هي محتاجة الإيد اللي تتمد لها دلوقتي وكل كلمة حلوة هاترجعلها الأمل في الحياة.. اكسبوا الحسنة دي وماتفكروش إلا في الخير.. وافتكروا إن الكلمة الطيبة صدقة”.
وعلق الفنان الشاب محمد علي رزق: “ارحموا من في الأرض يرحمكم من في السماء، أتمنى إن منى فاروق الناس تبعتلها في الشغل ويتعاملوا معاها عادي، كلنا بنغلط ومفيش حد فينا ملاك وكلنا عندنا بلاوي بس هو الواحد ماشي بستر الله مش أكتر”، فيما طالب الإعلامي محمد علي خير بتوفير فرصة عمل للفنانة والوقوف بجانبها.
يذكر أن الفنانة المصرية ولدت يوم 25 فبراير 1995، وبدأت شهرتها من خلال الظهور في عدد من الإعلانات، وانتقلت إلى عالم التمثيل عام 2015 عندما شاركت الفنان محمد رجب في فيلم “الخلبوص” ومن أهم أعمالها على شاشة التلفزيون “ظل الرئيس، رحيم”.
