دينا: ابني كره الفن عشان شافني بتعب.. رجالة مصر كلها تربية ستات
كشفت الفنانة دينا عن تجربتها وطريقتها في تربية ابنها الوحيد بمفردها بعد وفاة والده المخرج سامح الباجوري مؤكدة أن جملة “تربية واحدة ست” ليست مهينة كما يظنها البعض.
قالت دينا في برنامج “الستات” علي قناة النهار مع الإعلاميتين مفيدة شيحة وسهير جودة: كل بيوت مصر مربيينهم واحدة ست، مهما كان في رجل في البيت، فهو في عمله طوال النهار، يعود آخر الليل، مابيربيش، كل مصر مربياها ست”.
اضافت: في حالات الانفصال، وإيه اللي خلاه مش موجود؟ ما ياخد أولاده خميس وجمعة يربيهم؟ هو مش عايز يبقى موجود لو عايز أهلا وسهلا، ياخد الولاد يربيهم يشوف إيه اللي حاصل طول الاسبوع ويقومهم في اليومين، عدم وجود الأب صعب جدا، وصعبة على الأم، ودوما أنصح صديقاتي ماتطلقيش ولادك لما يوصلوا 12 سنة مش هتقدري عليهم.
اكملت: أنا أم صارمة جدا، ابني مش مرفه، ومحطتوش في سكة إنه يبقى مرفه، خليته يعتمد على نفسه، لأن أنا بعتمد على نفسي لحد انهاردة، وأنا معملتلوش أنا عملت لنفسي، هو يعمل لنفسه.
وردت الفنانة دينا على سؤال مفيدة شيحة عن سبب رفضها أن يستمتع ابنها علي بأموالها قائلة: ومايبقاش بني آدم؟ يبقى تابع؟ لو أنتِ بتربي كدة يبقى (في الفسكونيا)، يطلع رجل ويعتمد على نفسه، بيل جيتس أعطى لابنه 100 ألف دولار فقط ليبدأ بهم حياته، وهو يمتلك ملايين، لازم يتعلموا يعمل حياته ومسقبلة.
دينا تكشف طريقة تربية ابنها
قالت الفنانة دينا: ابني بقى شبهي غصب عنه لأنه عايش طول عمره معايا، وحب المطبخ عشان أنا بحب المطبخ، وعندما قرر دراسة الطبخ كنت عايزاه يدرس إدارة أعمال (بيزنس) وبعدها ياخد كورسات طبخ، ورد علي قائلا: (هو حضرتك لما قولتي لأهلك عايزة ارقص وافقوا؟) قولت له (لا)، وقال لي (أنت نجحتي في إيه؟)، قولت له (الرقص)، قال لي (ممكن تسبيني أدرس طبخ).. سكت وقولت له (اتفضل).
ابن دينا يرفض العمل في الفن
وعن رغبة ابنها في العمل في الفن رغم أن والديه فنانين، قالت دينا: أذنه موسيقية رائعة، عندما أرقص معه ينفذ الخطوات في 3 ثوان، لكنه لا يحب العمل في الفن، وأنا السبب، لأنه شافني بتعب أد ايه، فقال لي (لا لا أنا عايز اشتغل حاجة 5 أيام ويومين أجازة)
