تحدثت المخرجة إيناس الدغيدي عن الازمات والمشاكل التي تعرضت لها بسبب جرأة أفلامها قائلة وتفاصيل حياتها.
وقالت إيناس الدغيدي خلال برنامج أسرار مع الإعلامية أميرة بدر: الناس عايزة أي كلام تتكلم فيه، النقاد مبيشوفوش أفلامي جريئة، وأنا طلعت في الزمن الصعب، وأفلامي وفترة نضجي كانت في الزمن اللي ابتدت مصر تتقفل فيه.
محاولة اغتيال إيناس الدغيدي
أضافت إيناس الدغيدي: مصر كانت مفتوحة جدًا قبلها، ولما الإخوان مسكوا أول حاجة فكرت فيها أني آلاقي مكان آخر ليا، وكنت هروح دبي، واتحطيت على قوائم الاغتيال من جماعة اسمها الوعد منبثقة من جماعة الإخوان، وكانوا أساتذة في الجامعات، والله يرحمه وائل الإبراشي جابلي 40 صفحة عن الجماعة دي، كانوا حاطين رقم واحد حسني مبارك واتنين شيخ الأزهر، وتلاتة أنا، عشان بنشر الفسق والفجور، وكمان وحيد حامد وصفوت الشريف ونجيب ساويرس، ومكنتش حاسة بأي حاجة ساعتها.
واستكملت: مرة حطوا ليا في الجراج صورة السادات وعليها سلاح وكاتبين عليها المصير، يعني مصيري هيبقى كده، وسألت بتوع الجراج مين اللي حطها، قالولي منعرفش، وجوزي قالي بلغي البوليس، قلت له يمكن واحد أهبل مش عاجبه أفلامي، ومرة راجعة بالليل لقيت ملثمين دخلوا ورايا الجراج بموتوسيكل، أنا خوفت ومطلعتش من العربية.
تابعت المخرجة إيناس الدغيدي: بس كان واضح إنهم مش هيضربوني بالرصاص كانوا هيضربوني بمطواه، فضلت أضرب كلاكسات عشان اللي في الجراج يصحوا ويشوفوا اللي أنا فيه، وجريوا وكنت خايفة يعملوا حاجة في بنتي، ودخلتها جامعة بره مصر عشان الإخوان، وطول الوقت بيبعتولي، عشان ضد الحجاب، أيام الانتخابات، قلت نحاول نديهم فرصة، عبد المنعم أبو الفتوح كلمني، وعرفني بنفسه، وقالي إحنا مش ضد الفن وبنحب الفنانين والفترة دي قالوا إنه انفصل عنهم، قلت كان كده وكده يعني عشان داخل انتخابات وعايزني أدعمه، لكن أنا شايفة إن دول مش مصر خالص.
قصة حب إيناس الدغيدي
عبرت المخرجة إيناس الدغيدي عن قصة حبها لزوجها رغم اختلاف ديانته قائلة: اتجوزت اللي حبيته وقصة حب 9 سنين وتحديت كل حاجة حتى الدين وكان مسيحي واسلم عشاني، ودخلت السينما، وكانوا رافضين عشان الديانة ووالدي كان استاذ تربية دينية ولغة عربية، مقابلش جوزي لانه مات بعد زواجي بسنة، وقال مش هقابله عشان اغير دينه ومدخلش بيتنا غير فى جنازة ابويا، ومعملتش فرح، عملته في بيتي، وكان عندي بيتي قبل ما اتجوز ومستقلة.
سبب دخول إيناس الدغيدي الفن
قالت المخرجة إيناس الدغيدي: انا واحدة ربنا خلقها عكس الناس، ومش قاصدة لكن انا من طفولتي كده، احنا 8 اخوات انا عكسهم دايما وعلاقتي بيهم حلوة ووالدي توفى راضي عني، ولما بقيت مخرجة قال انا اللي شجعتها، ووعدته أن التمثيل لا، وانا دخلت كل الفن بالصدفة، ولا كنت اعرف يعني ايه فن، وحبيت زوجي لحد النهاردة، وعلاقتنا مش بس جواز هي حياة وكان دايما ورايا أكون مخرجة، وانفصلنا قبل وفاته، ابتدى يغير مني لما كبرنا، وسيبنا بعض بشياكة، لأن الحياة لوحدك احلى بكتير، وكل واحد بيبقى له حياته.
من هو زوج إيناس الدغيدي؟
حب 9 سنوات وزواج 30 سنة ودموع بعد الوفاة، ملخص حياة المخرجة إيناس الدغيدي مع زوجها نبيل معوض، التي ارتبطت به لمدة 30 عاما وبعدها أنفصلا قبل أن يتوفى في 2016.
نبيل معوض هو طبيب أسنان مسيحي أشهر إسلامه من أجل أن يتزوج إيناس الدغيدي وتم الزواج مدنيًا، ولكنهم انفصلوا وبينهم ابنتهم الوحيدة حبيبة، وظل لنبيل معوض زوج إيناس الدغيدي مواقف لا تُنسى من ذكراتها، حتى أنها تتحدث عنه في كل تصريحاتها.
نبيل معوض زوج إيناس الدغيدي السابق كان يتسم بالعملية، حتى أن أول هدية تلقتها منه كانت علبة مناديل، التي فرحت بها إيناس جدا رغم غرابتها وتفاجئها، حينما نزل من سيارتها، محضرا لها هدية ملفوفة في شريط هدايا فتوقعت أن تكون ألماظ أو ما شابه، حتى فتحتها ووجدتها علبة مناديل فتعجبت ليخبرها بأن سيارتها ليس بها علبة مناديل وبالتأكيد ستحتاجها، تعجبت إيناس من سعادتها بالهدية، لترى بأن ذلك اهتمام فقالت: «وحياة ربنا فرحت بيها.
تحدثت إيناس الدغيدي عن مواقف كثيرة لزوجها الراحل نبيل معوض.
