الفنان الراحل سعيد صالح، على الرغم من النجومية الكبيرة التي حققها في أعماله الفنية إلا أنه عانى كثيرًا خلال حياته خاصة خلال فترة سجنة.
سعيد صالح، كشف في حوار قديم له مع الإعلامي عمرو الليثي، في برنامج “واحد من الناس”، سبب حجه 14مرة وسبب إصراره علىارتداء زوجته للحجاب وتركها عالم الفن رغم أنها كانت ماتزال في بدايتها الفنية.
وقال خلال اللقاء: “حجيت لأنيكنت محتاج لده، وهي كمان كانت محتاجة ده، كنت بحبها وخايف عليها، خايف من الفن والوسط الفني، وكنت خايف من ربنا”.
وأضاف: “كنت بني ادم زي أي شاب، بعمل كل حاجه وطايش وبتاع حاجات من دي، وفجأة دخلت السجن قعدت سنة..السنة اللي قعدتها في السجن كانت سبب تغيير حياتي خالص، قابلني واحد اسمه عم يوسف لسه بعرفه لغاية دلوقتي .. هو عرف اني موجود في السجن، فبعتلي فمروحتش، وبعدين قررت اروحله ..لقيت زنزانته مليانه خير وأكل ومليانه ناس وعساكر”.
وتابع: “كان تمامنا الساعة ٥ في السجن، وبعدها بيقفلوا كل الزنازين، الا هو كانوا بيقفلوا زنزانته، بعد معادنا بساعتين، خدني وطلعنا جرينا في السطح ولقيته بيقولي مش عايز ربنا يكلمك؟ قولتله ربنا ؟! .. يكلمني انا ؟! طب ازاي؟ قالي اقرا قران هتلاقي ربنا بيكلمك ..سمعت الكلام ده وروحت جايب مصحف وبقيت اقرأ واحفظ واسمعله تاني يوم، لغاية ما بقيت بصلي واصوم ولقيت السنة مرت جميلة جدا، وعرفت حاجات كتير كانت غايبه عني”.
شعوره وقت دخوله مكة للمرة الأولى
وتابع: “خرجت من السجن قولت يارب عمرة بقى ..طلعت حجه ..حجيت ١٤ حجه ورا بعض سنة واحده بس اللي محجتش فيها، اللي هي السنة بتاعة انفلونزا الخنازير لكن إن شاء الله هكمل، والسنة الجاية هعمل حجة”.
وعن شعوره وقت دخوله للحرم المكي: “لما روحت لقيت صدري انشرح كدا، وحبيت الحكاية وتدينت جامد وانا اصلا والدي كان ازهري وكان عايز يطلعني حافظ قرأن بس أنا طنشت وكان طيش الشباب بقى!”.
وكشف عن خوفه من لقاء الله قائلًا: “ماهو لازم أخاف وكلنا نخاف بس احنا لو وضبنا نفسنا مش هنخاف ..اينعم ليا تاريخ مزفت بس اللي عملته هيغفرلي ان شاء الله، وانا واثق ان ربنا هيغفرلي”.
وعاني الفنان الراحل من مرض الزهايمر، لفترة طويلة قبل رحيله، ليرحل عن عالمنا في 1 أغسطس عام 2014، بعدمعاناة مع مشاكل صحية كثيرة.
