بعد أن استغاثت زوجته الإعلامية مي حلمي في مقطع فيديو، كشف زوجها الفنان محمد رشاد تفاصيل أزمته مع أحد المنتجين، والتي تسببت في تهديده بالسجن والحجز على منزله.
محمد رشاد ، قال في مقطع فيديو نشره، على حسابه الخاص على موقع “انستجرام”: “أنا حبيت أشكركم على كل كلمة وكل الدعم اللي شفته بسبب المشكلة اللي حاصلة، هي بقالها سنين بحاول أحلها بكل الطرق، بحيث إنها متأثرش على مستقبلي ومايكونش فيها ظلم لحد أو إنكسار أو مذلة لحد”.
وأضاف: “للأسف كل مرة ماكناش بنوصل لحل، وحبيت أحكيلكم عشان انتوا جمهوري وضهري وأقرب حد ليا، وانتوا معايا في نجاحي وأزماتي وكل حاجة وحشة وحلوة في حياتي، واللي جاي هيبقى أحلى بيكم”.
واختتم كلامه بقوله: “أنا ماحبتش أتكلم في تفاصيل المشكلة، لو مابقاش فيه حل غير كدة، أكيد هحكيلكم كل تفاصيل الحكاية، إيه هي وسبب المشكلة إيه”.
وكانت الإعلامية المصرية مي حلمي قد كشفت تفاصيل أزمة زوجها الفنان محمد رشاد مع أحد المنتجين، حيث أن زوجها مطالب بدفع 5 مليون جنيه.
مي قالت إنه نظرا لتعثر زوجها في الدفع فهو مهدد بالحبس، كما أنه تم إبلاغها أنه سيتم الحجز على شقتهما.
الإعلامية المصرية نشرت مقطع فيديو، على حساها على “انستجرام”، قالت خلاله باكية: “تخيلي تصحي من النوم تلاقى حد بيكلمك يقولك انا جاي احجز على بيتك وأثاث بيتك، كفايه وقف حال فينا طول 4 سنين انا كمان تضررت فيهم بسبب علاقات شخص يرغب في أذية محمد رشاد”.
وأضافت: “بدعم جوزي وبقول كفاية وقف حال فينا، فيه قضية والشرط الجزائي 5 ملايين.. واحد لسه بيبتدي حياته ده 30 سنة، حاول يكلم ناس كتير ويقسط المبلغ، لكن التاني كل اللي همه إنه يشوف البني آدم الطيب ده محبوس”.
وتابعت: “ليه هخبي حاجة زي دي النهاردة وأنتوا شوفتوا بدايتنا مع بعض وحبنا وخناقتنا وكل حاجة، تخيلي تصحي من النوم في بيتك اللي انتي تعبتي عشان تبنيه حد بيقولك إنه هيحجز عليه”.
وأكملت باكية: “كفاية 4 سنين وقف حال فيه وسنتين فيا، وأنا مكنتش أعرف، بسبب علاقاتك وأصحابك بتكلم فلان إني مشتغلش، تعالى خد اللي أنت عايزه، بس سيبنا في حالنا، لما أنت كارهه مضيت معاه ليه، مالك ومال شغلي مالك ومال حياتي، هو عايز ينفذ حكم على رشاد بسبب الغنا، رشاد عنوانه في طنطا مالك ومال بيتي؟”.
وكشفت: “جه عايز يكسر الباب هنا بدون سابق إنذار، ليه عايز تحبسه ليه عايز تأذيه وتأذينا في اسمنا وشغلنا وحياتنا، عشان شرط جزائي غنا في عقد 4 سنين كفاياك وقفت حاله”.
