كشف الفنان بيومي فؤاد لأول مرة- خلال استضافته ببرنامج صاحبة السعادة مع إسعاد يونس سبب مقاطعة أولاده له، مؤكداً أن زوجته وأولاده أكبر نقاد له.
وأوضح :” أنا عايش معاهم وفيه حاجات تنجح جماهيريًّا وتحقق إيرادات وهمَّ بيلوموني عليها يا إما شايفني بكرر نفسي وأنا أحيانًا بزعل منهم بس أنا متأكد أنهم حابين ليَّ الخير”.
وتابع: “أقسم بالله عمري ما اشتغلت علشان الفلوس واللهم لك الحمد ولادي متربيين على إن فيه فلوس تمام مفيش تمام”.
وأضاف: “ولادي الثلاثة محمد ونور وجود ، مرة شافوا عمل قعدوا أسبوع مقاطعني ومكنوش بيقولوا لي صباح الخير، ولما شافوا فيلم وش في وش كانوا معجبين جدًّا وجودي الصغيرة قالت لي هجب لك هدية ودا بتوفيق ربنا ثم نجاح المخرج”.
قصة حب بيومي فؤاد لزوجته أماني سويدان
بدأت قصة حب الفنان بيومي فؤاد وزوجته أماني سويدان داخل أسوار كلية الفنون الجميلة، علماً بأنهم لم يتزاملا خلال فترة الدراسة، وكانت فترة معرفتهم بعدما تخرج الفنان المصري بعدد من السنوات.
وقال بيومي فؤاد : “أنا أكبر منها بكتير ومحضرتش أيامي وأنا طالب، لكن كنت أروح الكلية أساعد في الإخراج للفرقة المسرحية أو أخرج أو أمثل”.
وتابع:” المخرج تامر محسن والسيناريست محمد عبد الخالق كانوا طلبة في جيل بعدنا، وعملوا ورشة انضمت لها أماني، وشافوا إنها ممثلة كويسة، لكن مكملتش في التمثيل وكطالبة شاطرة وتحصل على امتياز بدأت تساعد في الديكور، وشافتني أيام المسرح”.
واستطرد حديثه قائلاً:”ومش عارف كنت مستصغر نفسى عن الارتباط، وكان في دماغى أن اعتذر لها، لانها محترمة، ومش في دماغى، ولكن الكلام تغير على لسانى وعرفتها بنفسى، وساكنة فيه عشان أتقدم ليكى.. وكنت حاسس بحاجة من ناحيتها”.
وأضاف :”كنت بعمل بروفة لمسرحية في الكلية، وكان عندى شغل في الحكومة، ولما سألت عنى قال لها راح المنصورة يتجوز، وراحت عيطت، وقالت له أنا من المنصورة، وكانت العلاقة ما بينا جميلة، ومش كاره خالص أن بنتى تقول مش معجبة بحد ومفيش مانع أن بنتى تقول لي بأحب الولد، ولكن لو الولد خذلها مفيش مانع، وهتتعلم”.
وكشفت السيدة أمانى سويدان، زوجة الفنان بيومى فؤاد، عن تفاصيل ارتباطهما: “شوفت بيومى في المسرح، وكان عندى فضول استكشفه، ومرة من المرات بشوفة بيصلى، وفى الركعة الثانية سجد في قلبي، وقلت بحب الراجل ده قوي، ورحت البيت حكيت لهم، وهيتقدم لي وكان ده جنان، وحاجة مش طبيعية”.
وتابعت: “الخطوة التالية كانت أغرب، روحت البيت وقلت لهم في شخص اسمه كذا هيتقدم لكم، وهو مش عارف اسمي أصلا، وكانوا في انتظاره، وبعدها إتكلمنا والموضوع مشي بإيقاع سريع جدا”.
زوجة بيومي فؤاد تكشف عن معاناتها منه
وخلال اللقاء، قالت زوجة بيومي فؤاد: “بعاني كتير منه هو مدمن للعمل ودي الأزمة الكبيرة عندنا كلنا، إحنا طبعا مقدرين شغله وحجم حب الناس له، وانتشاره وشهرته والطلب عليه، لكن في نفس الوقت حابين يكون لنا من الحب جانب، والبيت يكون له مساحة من حياته”.
وتابعت: “هو دايما يقول على نفسه أنا عشوائي، وأنا عكسه ومنظمة جدا، وده عامل مشاكل من أيام خطوبتنا”.
ولفتت: “بيومي فؤاد لا رومانسي ولا حبيب ولا نحنوح بس هو مش بخيل، هو جوزائي ومتناقض طول الوقت وأحيانًا يبقى حكيم وأحيانًا يبقى موتور ولما عرفت إنه جوزاء لقيت إن التوافق بينا يكاد يكون منعدم”.
آخر الأعمال الفنية للفنان بيومي فؤاد
يذكر أن آخر الأعمال الفنية بيومي فؤاد هو فيلم “الإسكندراني” في السينمات، من إخراج خالد يوسف، ومستوحى من رواية تحمل الاسم نفسه للكاتب الراحل أسامة أنور عكاشة، وشاركه البطولة الفنان أحمد العوضي، زينة، عصام السقا، بيومي فؤاد، حسين فهمي، صلاح عبد الله، محمود حافظ، محمد رضوان، ورحاب الجمل، الفيلم من إنتاج شركة مصر العربية للإنتاج السينمائي بالتعاون مع روتانا ستديوز.
تدور أحداث الفيلم حول قصة شاب يعيش في مدينة الإسكندرية ويتعرض لمجموعة من التحديات والصراعات في حياته اليومية، كما يتناول الفيلم عدة قضايا اجتماعية وسياسية مهمة، ويسلط الضوء على بعض الجوانب القاسية في المجتمع المصري.
