دخل الفنان بيومي فؤاد في نوبة بكاء على الهواء مباشرة بسب أزمته مع الفنان محمد سلام موجها رسالة مهمة له.
وقال بيومي فؤاد خلال برنامج “حبر سري”، مع الاعلامية أسما ابراهيم : أنا صدقتك جدا في الفيديو وأنت قلت في الفيديو بتاعك لا نفاق ولا رياء، وانا قلت وجهة نظري العبيطة علشان أنا راجل طيب مكنتش هتخسر حاجة لو طلعت تقول أنا مقدرش أروح ومش معنى أن محمد أنور قدر وراح يحصل معاه كده يا جماعة خصوصا أنك طلعت دافعت عن أمير كرارة لما طلعت شائعة أنه مشاك من المسلسل بتاعه.
رسالة بيومي فؤاد لمحمد سلام
ووجه بيومي فؤاد رساله للفنان محمد سلام: ربنا معاك.. ولو سأله وهقوله ازاي متطلعش تدافع عننا وعن محمد أنور وهو ترشيحك وحقك عند ربنا”.
واضاف: طلعت دافعت عن أحمد الجنايني ليه مطلعتش تدافع عن محمد أنور مش عني وانا كنت كل يوم بسأل قبل وبعد الفيديو وده اللي كنت مستنيه منك ورزقك على الله والعمر واحد والرب واحد، لكل اللي شتموا وكل اللي فهمني غلط انا غلط بس رجال واطلع في كل برنامج اقول كده.
بيومي فؤاد في الكبير أووي
قال بيومي فؤاد: طلبت إني مقابلش محمد سلام في كواليس مسلسل الكبير 8، وفي مشاهد اتعاد كتابتها عشان منتقابلش، أو اعتذر عن الدور وارجع الفلوس”، وذلك حسب تصريحاته في برنامج “حبر سري” الذي تقدمه أسما إبراهيم عبر شاشة “القاهرة والناس”.
وتابع: أحمد مكي حاول يصالحنا لكني رفضت، لأنها مش هتخلص كدة، هتخلص عن الله.
تفاصيل آخر مكالمه بين بيومي وسلام
كشف الفنان بيومي فؤاد عن تفاصيل آخر حوار جمعه مع الفنان ٤ ٢٣محمد سلام، بعد نشر الأخير فيديو اعتذاره عن عدم المشاركة في مسرحية “زواج اصطناعي” ضمن موسم الرياض.
وقال بيومي فؤاد: أنا كبير محمد سلام وأنا المرجع بتاعه، وكلمته لما اعتذر عن المسرحية وقالي أنا مش قادر أنت شايف الأطفال اللي بتموت، وقولتله بدعيلهم قبل ما بدعي لأولادي، وده أكل عيش وفيه ناس كتير بيوتهم مفتوحة من الحاجات دي، وسألته ترشح مين، قال أي حد من مسرح مصر”.
وأضاف: لما شوفت الفيديو اتصلت به يحذفه، قال لي لأول مرة في حياتي هقولك لأ، قلت له براحتك يا بني، وقفلت ومتكلمناش من ساعتها.
أزمة بيومي فؤاد ومحمد سلام
كان الفنان محمد سلام نشر فيديو عبر حسابه بموقع فيس بوك قال فيه، إنه توقع أن يتم إلغاء موسم الرياض بسبب الأحداث التي تشهدها غزة، لكن ذلك لم يحدث فاضطر للاعتذار عن السفر، لأنه لن يستطيع أن يقدم كوميديا ويرقص، تزامنا مع ما تشهده فلسطين من أحداث مؤسفة.
وقال سلام أنه شعر بأنه لو فعل ذلك كأنه يساهم في قتلهم أيضا، وهو ما رفضه تماما، رغم يقينه أن القرار قد يأتي بنتائج عكسية له، ويؤثر على عمله ودخله فيما بعد، لكنه أصر، وقال: مش هموت من الجوع.
ورد بيومي فؤاد في نهاية عرض مسرحية بعد اعتذار محمد سلام قائلا: “من حقك أنك تعتذر عن المسرحية لكن مش من حقك أنك تغلط في فنك، إحنا مبنجيش علشان نضحك حضراتكم إحنا بنقدم فننا المصري إنتوا بتحترمونا وإحنا بنحترمكم جدا شيء عظيم أني أخرج اتصور مع شاب سعودي ومع سيدة سعودية وهي تعلم أني مصري أنا بشرف بلدي”.
وأكمل: أنا فنان مصري وليا الشرف جيت المملكة العربية السعودية وليا الشرف كتر خيركم كتر خيركم كتر خيركم، إحنا بنتعب وبنشقى عشان نقدم فن مش عشان نيجي نضحك لو الموضوع كده يبقى في فنانين من أيام نجيب الريحاني لغاية محمد أنور المفروض ينتحروا إحنا بنقدم فن.
